NeureHitz 5 eta 8 urte bitarteko haurren euskarazko hizkuntza-gaitasunen ebaluaziorako diseinatutako tresna klinikoa da. Banaka ezarri beharreko tresna honek hizkuntza zein komunikaziorako nahasmenduak identifikatzea eta esku-hartzeak gidatzea ditu xede. Guztira, bateria 10 atazez osatuta dago eta hizkuntzaren arlo guztietako –fonetika eta fonologia, hiztegia, morfosintaxia eta semantika– ulermen zein adierazpenean parte hartzen duten prozesu psikolinguistikoak aztertzeko erabili ahal izango da.
Bateriaren garapenean lanean dihardugu, beraz, proba guztiak oraindik ez daude eskuragarri. Jarraian ikus daiteke bateria osatuko duten proba guztien laburpena:
Ataza: Ahozko esaldien ulermena
Helburua: Zailtasun-maila ezberdineko ahozko esaldiak interpretatu eta ulertzeko gaitasuna ebaluatzea.
Deskribapena: Haurrak, 4 irudiren artetik, entzundako esaldiari dagokiona aukeratu beharko du.
Ataza: Epe laburreko oroimena: hitzak
Helburua: Hitzak epe laburrean gogoratzeko gaitasuna ebaluatzea.
Deskribapena: Haurrak entzunezko hitzak errepikatu beharko ditu.
Ataza: Epe laburreko oroimena: pseudohitzak
Helburua: Asmatutako hitzak epe laburrean gogoratzeko gaitasuna ebaluatzea.
Deskribapena: Haurrak entzunezko pseudohitzak errepikatu beharko ditu.
Ataza: Epe laburreko oroimena: esaldiak
Helburua: Gero eta luzera zein zailtasun handiagoko esaldiak epe laburrean gogoratzeko gaitasuna ebaluatzea.
Deskribapena: Haurrak entzunezko esaldiak errepikatu beharko ditu.
Ataza: Sintaxia: esaldi sinpleak
Helburua: Bai semantikoki bai gramatikalki zuzenak diren ahozko esaldi sinpleak osatzeko gaitasuna ebaluatzea.
Deskribapena: Haurrak zenbait irudi ikusi eta esaldiak osatu beharko ditu.
Ataza: Hiztegia
Helburua: Gaitasun lexikoa ebaluatzea.
Deskribapena: Haurrak irudiak izendatu beharko ditu.
Ataza: Prozesu fonologikoak
Helburua: Ekoizpen fonologiko zein fonetikorako gaitasuna ebaluatzea. Gaitasun hau 3 ezaugarriren bidez neurtzen da: bat-bateko hizketa, izendapena eta errepikapena.
Deskribapena: Bat-bateko hizketa: Haurrak zenbait irudi ikusiko ditu, aztergai diren fonemak dituzten hitzen bat-bateko ekoizpena eragiteko xedez.
Izendapena: Haurrak aurreko fasean ikusitako irudietan nabarmendutako atalak izendatu beharko ditu.
Errepikapena: Haurrak aurreko faseetan ikusitako irudiei dagozkien entzunezko hitzak ozenki errepikatu beharko ditu.
Ataza: Epai gramatikala
Helburua: Zenbait esalditan arau morfosintaktikoak ezarri eta identifikatzeko gaitasuna ebaluatzea.
Deskribapena: Haurrak entzunezko zenbait esaldi zuzenak diren ala ez erabaki beharko du.
Ataza: Kontzientzia fonologikoa: Errima
Helburua: Errimaren bitartez, Haurraren kontzientzia fonologikoaren inguruko gaitasuna ebaluatzea.
Deskribapena: Haurrak bi irudi ikusiko ditu aldi berean eta, 3 segundoren ostean, pseudohitz bat entzungo du. Bere iritziz audioarekin errimatzen duen irudia aukeratu beharko du.
Ataza: Entzumen bereizketa: silabak
Helburua: Haurraren entzunezko silabak bereizteko gaitasuna ebaluatzea.
Deskribapena: Silaba bat ahoskatuko duten hiru silueta ikusiko ditu. Haurrak, bi irudi txiki alboetan eta handi bat erdian. Haurraren helburua zera bereizten jakitea da: silueta txikien artetik zeinek ahoskatzen duen silueta handiak ahoskatutako silaba berdina.
