Please fill in below form to create an account with us
NeureHizki Lehen Hezkuntzako 4. maila eta Bigarren Hezkuntzako 4. maila bitarteko ikasleen euskarazko irakurketa-idazketaren ikaskuntzan parte hartzen duten prozesu kognitiboak ebaluatzeko helburuarekin diseinatutako tresna klinikoa da. Banaka ezarri beharreko tresna honek irakurketa-idazketaren ikaskuntzaren inguruko nahasmenduak identifikatzea du xede. Bateria osoa prozesu horiek ebaluatzeko balio duten 7 atazez osatuta dago.
Bateriaren garapenean lanean dihardugu, beraz, proba guztiak oraindik ez daude eskuragarri. Jarraian ikus daiteke bateria osatuko duten proba guztien laburpena:
Ataza: Hitz zerrendaren irakurketa
Helburua: Irakurketa-maila ebaluatzea, zenbait hitzen maiztasun zein luzeraren arabera.
Deskribapena: Haurrak maiztasun (altua-baxua) zein luzera (luzea-motza) ezberdineko 4 hitz-zerrenda irakurriko ditu paperean. Tabletaren bidez irakurketa-saioa grabatu eta erantzun-denborak zein huts-egiteak erregistratuko dira.
Ataza: Pseudohitzen zerrendaren irakurketa
Helburua: Irakurketa-maila ebaluatzea, grafema-fonema bihurketarako gaitasunaren arabera.
Deskribapena: Haurrak luzera (luzea-motza) ezberdineko 2 hitz-zerrenda irakurriko ditu paperean. Tabletaren bidez irakurketa-saioa grabatu eta erantzun-denborak zein huts-egiteak erregistratuko dira.
Ataza: Zentzurik gabeko testuaren irakurketa
Helburua: Irakurketa mekanikoa ebaluatzea, laguntza semantikorik gabeko idatzizko testuinguru batean.
Deskribapena: Haurrak zentzurik gabeko testu bat irakurri beharko du, paperean. Irakurketa-denbora 3 minutukoa izango da.
Ataza: Fonemen banaketa
Helburua: Fonema mailan, ahozko hizkuntzaren gutxieneko egiturak identifikatu eta erabiltzeko gaitasuna ebaluatzea, entzundako hitzen banaketaz baliatuz.
Deskribapena: Haurrak asmatutako hitzak entzun eta soinutan banatu beharko ditu.
Ataza: Lehenengo hotsaren omisioa
Helburua: Fonema mailan, ahozko hizkuntzaren gutxieneko egiturak identifikatu eta erabiltzeko gaitasuna ebaluatzea, entzundako hitzaren lehen hotsa alde batera utziz.
Deskribapena: Haurrak asmatutako hitzak entzun eta, ondoren, lehen fonema alde batera utzi eta gainontzekoa ekoitzi beharko du.
Ataza: RAN objektuekin
Helburua: Irudiak azkar izendatzeko gaitasuna ebaluatzea.
Deskribapena: Haurrak zenbait irudi ahalik eta azkarren izendatu beharko ditu.
Ataza: RAN zenbakiekin
Helburua: Zenbakiak azkar esateko gaitasuna ebaluatzea.
Deskribapena: Haurrak zenbait zenbaki ahalik eta azkarren esan beharko ditu.